2015年05月21日 星期四
笨賊笨7故事
是咁的，噚日凌晨有個神偷諗住爆竊一間手提電話舖，你知啦，呢啲行動不容有失嘛，神偷專登用自家製高科技流星鎚做武器㗎，終於畀佢成功偷走咗兩部手提……嘅樣版，總值10000……毛。雖然呢個神偷係單獨行事，但佢一啲都唔孤單，因為呢個世界，同佢一樣咁蠢嘅賊實在太多！
蠢得嚟有貢獻
1995年嘅美國，有神偷打劫銀行之前，用檸檬汁搽勻晒塊面，你唔係以為佢諗住美顏呀？佢見檸檬汁可以製造隱形墨水，心諗咁應該都可以令自己喺閉路電視下隱形，你睇我唔到，你睇我唔到。但最後警方係喺閉路電視度睇到佢，即日拉Q咗佢囉。
PS. 事後話：呢件事啟發咗兩個心理家，令佢哋發現「達克效應」呢個心理現象（所謂「達克效應」，就係講人對自己唔熟悉嘅範疇，會表現得出奇自信，例子可以望下你腦細），仲拎埋「搞笑諾貝爾獎心理學獎」，今次唔係要多謝高登先，係要多謝個笨賊先呀！
（資料來源：New York Post）
2015年05月21日 星期四
笨賊笨7故事
突破盲腸
香港地好難買到枝槍，所以大大提高打劫嘅難度。但呢啲雞毛鴨蒜嘅事又會點難到班神偷呀？其中有個賊就學武俠高手咁以手作劍，諗住可以好似雷神咁，一嘢轟落去！不過可能佢未學滿師就半途出家啦，咪撻晒Q囉！
（資料來源：蘋果日報）
臭腳賊
