我毛孩最怕人哋冇文學修養，開口埋口「好打意牙」、「好搞笑禾」、「勁Kai囉」……聽到我都硬了（拳頭）。為咗增進大家嘅文學水平，我決定同大家些牙吓各式各樣古今常用嘅語句，等大家同人膠流都可以有多啲詞彙使吓。今期就教大家「笑到乜乜乜」有咩唔同組合。

笑到肚痛

意思：最傳統，最普通嘅一句，同阿婆講完都唔使解釋，即係笑到個肚好痛。

毛孩造句：我入到醫院同醫生講我笑到肚痛，醫生笑到肚痛呀！

笑到有腹肌

意思：大笑時，有時身體甚至會捲曲，動作像在做Sit Up一樣，所以笑得太厲害就有腹肌。

毛孩造句：蔣元秋讚高局長好Man，我笑到有腹肌，搞到我都好Man。

笑到HiHi

意思：高登用語，HiHi =仆街，所以笑到HiHi即是笑到仆街。

毛孩造句：香港人最鍾意睇人仆街，見親都會笑到HiHi！

笑到抽筋/笑到橫隔膜抽筋

意思：由於笑得太勁，身體大力郁動搞到抽筋（唔……其實真係要解？）。

毛孩造句：好在你係笑到抽筋，唔係Tree根咋！佢真係令人笑到橫隔膜抽筋。

笑到GapGap聲

意思：網民獨有用法，新一代擬音詞。Gap Gap聲形容笑聲，特別常用於嘲諷訕笑。

毛孩造句：可能我同亡國興之間有好大個Generation Gap，我一聽佢好認真咁講廢話，我就笑到Gap Gap聲。

笑到撳平安鐘

意思：笑得真的太厲害了，連呼吸也很困難，所以要按平安鐘報警求助。

毛孩造句：有個阿婆心臟病發，撳唔切平安鐘，失救死咗，嘩，我笑到撳平安鐘……講笑咋！我邊有咁邪惡呀？哈哈哈……你係咪笑到撳平安鐘呢？