話說香港將會學日本搞「廢柴機械人比賽」，策劃人話個比賽鬥輸、鬥廢，可以畀從未感受過失敗嘅香港人體驗吓失敗嘅滋味喎。嗚呀！估唔到呢個世界原來有好多智慧與美貌都唔需要並重嘅比賽，啱晒我呢啲廢青參加㗎！

芬蘭：掟手機比賽

呢個比賽嘅目的係畀人用一個霸氣嘅方法掟咗部舊手機，掟得最遠咪贏囉，贏咗就有部新機嘞，實在係好啱據說成日換手機嘅香港人，不過輸咗咯，咪自己出錢換過部囉。

資料來源：台灣WiKi

愛爾蘭：吹口哨比賽

聞說第一屆嘅冠軍就係利用佢高超嘅吹口哨技術追到佢老婆，香港咁多毒L想脫毒就好好練吓點吹口哨啦！

資料來源：Alive Forum

美國：電話亭塞人大賽

遊戲規則好簡單，就係喺個電話亭度鬥塞得多人。鬥迫鬥塞呢家嘢，簡直係香港人嘅強項啦！不過要塞就要快喇，香港唔係淨返好多電話亭㗎咋！

資料來源：中國新聞網

英國：腳趾摔跤比賽

呢個拗腳趾公比賽，輸咗嘅人要瀨贏咗嘅人隻腳趾公，香港搞嘅話可以考慮吓加個男女混賽，一定好受歡迎啫！

資料來源：MZDU 

英國：掟雞蛋比賽

呢個比賽有兩種玩法，一係就掟人、一係就掟自己。如果香港搞呢，就應該要轉掟高牆。

資料來源：人民網 

美國：臭鞋大賽

咁多對臭鞋，唔好話比賽現場，我隔住個Mon都聞到臭囉！呢個比賽啱晒啲有香港腳嘅香港人，但真係難為啲評判，索咁多臭鞋，應該會索到冇知覺……

資料來源：痞客邦