【如果你工作累鳥】地踎男神逐個捉
12

《食神》教落,只要有心,人人都可以係男神。唔係下下都要高富帥,好似有父幹有樓仔嘅大劉仔先得嘅,連豬肉佬都可以叫肉類分割技術員,你就知男神無分貴賤,仲分分鐘越市井越吸引,貪佢肯忍氣吞聲做勞動工作,有血有汗有肉地,諗起都痕痕哋……嗚呀,仲等?一齊左青龍右滑鼠睇J……我講J圖咋衰鬼。

合益巨人

圖片來源:Facepop

呢張攝於元朗合益街市外嘅爆肌推車男慾肉照喺網上瘋傳,簡直為港增光。

圖片來源:《少林足球》劇照

毛孩只想學《少林足球》嘅田雞問一句,如果我係架手推車,唔知……我頂唔頂得住呢?

 

瀟灑豬肉榮

圖片來源:網絡圖片

望見呢位哥仔隻手瓜就知佢係個出色嘅男人,就算匿喺廣西南寧一個街市入面,一樣好似漆黑中嘅螢火蟲一樣,咁鮮明!咁出眾!瀟灑程度僅次敝台東方昇!

 

台北涼糕哥

圖片來源:planetdaily

呢位擁有完美腹肌嘅涼糕哥,係台灣北大體育系學生,仲要係排球校隊喎……連睇慣中國女排嘅毛毛都想用黃一梅式重炮轟一轟佢,同佢嚟個特訓,hehe。

 

洗碗小哥

圖片來源:youqutu/ HOLYCOW2015

來自廈門大學嘅洗碗哥兼職去做Café,可惜太靚仔所以畀人影咗相仲放上網,從呢個低炒角度、恤衫顏色同姿勢所見,唔知點解……我諗起我其中一位腦細。

【如果你工作累鳥】地踎男神逐個捉
12

有奶便是男神

圖片來源:xl7788.com

喺華東理工大學沖奶茶嘅佢,係咪同打過NBA嘅香港巨星FishermanLok有啲似?嗯,其實我都好鍾意飲奶奶㗎……

 

湖南燒餅哥

圖片來源:重慶商報

呢位燒餅哥夠膽死自己開檔叫「帥哥燒餅」,門外仲經常排晒長龍,對自己個樣充滿信心。忽發奇想,如果毛毛又想開檔嘢,不如集思廣益下應該叫咩名?

 

 

寧波饟餅大叔

圖片來源:網絡圖片

你睇阿大叔佢有朝偉嘅眼神,金城武嘅外型,集二人之長在一身,但係聽聞佢阿爸阿媽要佢去相睇,乜原來大陸啲相睇咁高質素㗎咩?

 

小司機

圖片來源:新華網 / 微博

蘇州地鐵一號線嘅呢位司機靚仔得嚟充滿陽光氣息,唔少豬妹都要組團搭地鐵會佢一面。但問心吖,如果佢係港鐵舉牌擋人衝門嗰個,你一早X到佢化啦。

12
毛記電視網站 · 版權所有 · 不得轉載 Copyright © TVMOST.COM.HK All rights reserved