節目重溫
星期三港案

良心發現,認真製作,

緊貼時事,淺入深出。

毛記電視新聞部出品,每集5至10分鐘不等,

毛記主播聲音導航,超微型新聞紀錄片。

佢叫阿富。14年前,即係22歲個陣,啱啱出嚟見識呢個社會。年少氣盛,以為冇嘢輸唔起嘅佢,因為一場交通意外,令到佢冇左一隻手。

呢14年嚟,唔單止身邊嘅人,就連佢自己都睇唔起自己,覺得自己嘅人生玩完。
今日阿富可以好平靜咁講返截肢嘅事出嚟,因為佢經已戰勝咗不幸。阿富好想話畀大家知,即使少咗一隻手,佢嘅人生都一樣可以過得好滿足,就憑一隻手,佢都可以拉奏出一首首動人嘅樂曲。
呢度係花,呢度係花,連呢度都係花!嘩!畫到成間屋都係花嘅,就係佢,花婆婆。今年87歲嘅花婆婆每日一起身,就會拎起支畫筆畫畫,呢度畫下,嗰度畫下,有時會畫下貓貓狗狗,但最鍾意畫、畫得最多嘅,都係一朵朵、五顏六色嘅花。

本身喺花墟賣花嘅花婆婆,退休之後,已經畫咗超過3000朵花喇。之所以咁勤力畫花,因為花婆婆想用佢餘下嘅時間,去多謝花。
喺美孚一個好唔起眼天橋底,有一檔補鞋舖。
呢度嘅老闆蘇師傅由細到大就幫屋企人手補鞋,一補就補咗40幾年喇。
無論係咩種類、爛到有幾誇張嘅鞋,只要補到,蘇師傅都會補返好佢。

蘇師傅話:「鞋要好,路先會行得穩。」
呢間補鞋舖叫「根記」,因為鞋就係每一個人嘅根。
而呢度,亦都係蘇師傅嘅根。
上星期,有一隻銀狐犬「小白」懷疑被主人掉落海、後來成功被水警救返之後,再被主人用殘忍嘅手法殺害。
本來對主人忠心耿耿、值得被愛錫嘅小白,結果喺受盡一切折磨之下,帶住痛苦離開呢個世界。

本身係動物義工嘅Ricco,一直以嚟都見到唔同狗仔因為各種原因被主人虐待、遺棄。佢就係一次救狗行動入面拯救咗圓圓同豆豆,最後仲收養埋佢哋。

Ricco希望,可以透過圓圓同豆豆話畀大家知,每一隻狗仔都唔應該無辜咁被人拋棄、虐待
因為一次養青蛙嘅經驗,阿希 佢就同呢個兩棲類世界接通咗,仲同佢哋做埋好朋友。
不過呢班朋友唔係成日見到。有時阿希會好掛住佢哋,掛到三更半夜自己一個上山搵佢哋...
唔講唔知,原來呢個香港有好多呢啲兩棲類動物㗎!

不如下次見到青蛙啊、四腳爬爬啊
不要說:哇!快啲打死佢哋啊!
試著說:哇!呢隻青蛙都幾cute啊!

呢個小朋友叫樂樂,8年前嚟到呢個世界。但喺佢4個月大嘅時候被確診左一個連醫生都解釋唔到嘅罕有病。因為冇左一啲基因,令到樂樂做所有嘢都會有障礙。

呢8年嚟樂樂媽同樂樂受盡其他人嘅歧視,聽盡冷言冷語。但即使樂樂媽有幾委屈都好,佢都冇諗過要放棄樂樂。因為佢覺得,無論喺人哋眼中,阿囝有幾差,甚至,8歲大嘅佢,連一句「媽媽」都叫唔到,但喺佢心入面,呢個囝都係最完美嘅!
嘩嘩嘩~ 有冇搞錯啊妳?喺香港打機唔讀書咁樣得㗎咩?
你失敗啊,你無用啊,你廢青啊!
原來呢個叫阿熙嘅妹妹仔,喺3年前嘅一個暑假,因為讀書讀得唔開心,諗住減下壓打下機。點知!一打就停唔到手,仲要打到入電競呢一行,做埋女子隊職業選手,順手贏埋LOL女王盃冠軍!誓要日日打,秒秒打,打都死嗰刻都要打!
讀書?打埋呢舖機再講啦!
前兩日,有「香港後花園」之稱嘅南生圍出現咗一場唔尋常嘅大火,最後燒咗足足17個鐘先救熄。

呢場大火裡面無人命傷亡,但其實呢場大火經已徹底咁破壞咗呢度嘅生態同迫走咗住喺呢度嘅雀仔。

同樣住喺南生圍嘅阿業WaterBear水熊阿蟲,對住呢啲突如其來嘅大火,佢知道終有一日呢度唔再會有候鳥飛嚟住,所以早前,佢自己就係度,一手一腳搞咗個南生圍候鳥展覽 。

阿業希望,喺南生圍嘅候鳥消失之前,畀大家知道,南生圍呢個濕地緩衝區,其實係有一啲好珍貴嘅候鳥...
好好聽啊!Encore!Encore!
邊個咁好唱口?唱到個個街坊經過都會企定定、豎起耳仔咁專心聽佢唱歌啊?

呢位咪就係之前喺網上被人瘋傳唱歌片段,仲畀網民大讚係香港好聲音嘅Judas囉!23歲嘅Judas喺三年幾前第一次接觸busking之後,就全職做街頭歌手,希望用心唱好每一首歌,能夠用自己溫柔嘅歌聲,打動每位路過嘅途人...
上星期,一班九巴車長因為不滿公司一直無正視車長人工低、工時長、長期唔夠人手嘅問題,只係提出一個所謂嘅「薪金優化方案」,即係將本來車長可以拎到嘅獎金,加返入底薪度,最後車長其實係一蚊都無拎多到。
所以,本身係九巴車長嘅葉蔚琳,就同一班車長喺WhatsApp group度,自發組識咗「月薪車長大聯盟」,上星期六晚發動巴士罷駛,希望公司可以正視一直以嚟嘅問題。

從來無諗過自己會企到咁前,從來無諗過自己係車長但又唔去開車嘅葉蔚琳話,就算今次係螳臂擋車,佢都唔驚,因為呢個就係要做嘅事!
毛記電視網站 · 版權所有 · 不得轉載 Copyright © TVMOST.COM.HK All rights reserved