上個禮拜就又有班讀大學嘅廢靑為咗搏上鏡，衝咗入香港大學校委會嘅開會會場度搞事，搶晒社會嘅目光，連盧醫生表演直立跌倒都無補於事，搶唔返個焦點返嚟。

而校委會成員之一嘅麥嘉軒喺嗰日都被班廢青圍住，最尾仲要入埋醫院。麥嘉軒嘅老公劉遵義就寫咗篇文登喺今日嘅明報話呢班大學生係「被寵壞的小混蛋們」。佢仲話為咗要懲罰呢班暴徒，最好就監禁佢哋一日咁大把，因為佢話如果呢班廢青真係相信自己係正義嘅，坐監又有乜問題喎，曾德成、曼德拉都係咁啦。

不過香港土地問題嚴重，就算拉晒佢哋，監獄都未必有咁多位，正苦可以考慮勾結外國勢力，送晒佢哋去外國嘅監獄。外國啲監倉分分鐘仲大過同靚過晒佢哋屋企……

挪威嘅監獄設施齊全，連雪櫃同電視都有，衣食無憂呀喂。

德國個監倉就有張梳化，仲有個會議室，唔知是咪畀啲犯一齊傾越獄大計呢？

瑞典呢個監倉除咗可以做健身，仲可以自己煮埋嘢食?呀，呢啲先係quality of life嘛。

外國啲監倉咁正，話唔定啲廢青去咗之後唔捨得返嚟呀，唔好話一日，畀你困足一世又點吖？橫掂喺香港日日返工都係坐監咁款㗎啦。正苦快啲同外國政府傾掂數，送晒班廢青走啦，然後招攬返勤奮上進嘅強國青年入嚟。咁以後冇晒班廢青，香港就有希望喇。

來源：香港大學學生會學苑即時新聞、明報、Times 、  takepart.com、rtoz.org、  蘋果日報