最近有台灣網民發起咗個「將動漫名稱其中兩個字改做台灣」嘅活動，睇得出台灣人真係好愛台灣（嗯，毛毛都好愛台......妹）。香港人當然唔執輸，即刻玩埋一份啦，不過就唔係改做「香港」，而係改做「港鐵」呀！

又係嘅，香港人成日都搭港鐵，要玩梗係唔少得佢啦！呢個活動已經吸引咗超過300幾個網民留言，毛毛精心挑咗幾個出嚟，再幫佢哋整埋張海報：

網民留言：《死亡港鐵 DEATH MTR》

毛評：Er......港鐵既安全又準時，最多耐唔時故障吓啫，點會係死亡港鐵喎？

網民留言：《進擊的港鐵》

毛評：呢個名就貼切得多！港鐵職員真係每分每秒都進擊緊啲帶大件行李搭港鐵嘅hihi㗎！（ps：唔包括水貨客同強國人）

網民留言：《港鐵移動城堡》

毛評：港鐵成日幫大家移動呢樣嗰樣，移動埋個城堡？濕濕碎啦！

網民留言：《好想告港鐵》

毛評：嘩，竟然將純愛少女漫畫《好想告訴你》改咗做《好想告港鐵》，係咪想作反呀？

不過毛毛相信大家唔係想作反嘅，只係個比賽規則限咗一定要改兩個字，先由《好想告訴港鐵》變做《好想告港鐵》啫，嗯，一定係咁！最後溫馨提示，雖然大家都好有創意，但創意呀藝術呀呢啲嘢係完全冇經濟價值㗎～大家都係畀啲心機OT啦！

封面圖片：網易

來源：風之春夢／世界係屬於cap圖粉嘅