而家科技咁發達，差唔多咩嘢都可以喺網上面買到。毛毛身為廿一世紀嘅毒L，梗係要善用呢種科技，咁就算幾十年冇出街都唔會餓死吖嘛（其實係冇人約，嗚……）。而韓國有個網民都同毛毛一樣鍾意上網買嘢，點知一見到個包裹就即刻喊出嚟呀……

嗱呢個就係個韓國網民想買嘅朱古力棒棒。唔知是咪真係好好食啦，佢竟然一次過訂咗60條咁多！不過就要求係兩條一盒，總共30盒咁送嚟。點知間快遞公司夠膽死剩係送兩盒嚟，仲要每盒得一條！玩嘢咩大佬！於是個網民就嗱嗱聲打過去搵返其餘嗰58條啦！結果……

喂，咩事先而家。一炮過咁送56個紙盒嚟，仲要每個盒入面得一條朱古力，是咪想撩交打先？計下條數，60減2再減56，都仲係差2條喎！數都計錯，走啦你，毛毛唔想搞大件事呀。個網民見到呢個情況都表示崩已潰，打電話去問發生咩事啦，原來係總公司嗰邊處理有問題，仲話剩低嗰兩條朱古力第二日就會送到嚟喎。嗯，其實樂觀啲諗，啲紙盒分分鐘仲貴過條朱古力呀，而家買朱古力送成幾十個紙盒，執到啦。不過係衰在唔環保囉！

唉，慘得過有人連件都拎唔到呀！冇呀，爆咗炸啫......RIP......

封面圖片來源：naver

資料來源：naver、ettoday

回帶：【天津爆炸】網民：我的淘寶貨GG了