一見到成屋都濕漉漉，啲衫晾極都唔乾，就知道春天嚟到喇！作為小清新文青，春天梗係要去親親大自然，同花花影相相啦～聽講家下桂林有個監獄嘅員工宿舍開滿晒桃花呀！

嘩～一眼望埋去，就係一大片桃紅色嘅花海，毛毛真係好想立馬射波衝去影小清新相呃like（同跑返幾個圈呃桃花運）呀！嗚呀～！

有唔少人都同毛毛一樣咁鍾意啲花花，就湧晒入監獄宿舍區睇花，不過就因為有好多冇公德心嘅同胞周圍掉垃圾，搞到監獄宿舍決定閂咗道大門佢，唔畀人入去呀！幾嚿垃圾仔啫，咁都包容唔到！

不過世上已經冇人可以阻止到同胞想睇桃花嘅決心！呢位強國大媽系文青就無懼險阻，就算翻牆就要爬入去監獄宿舍同花花玩遊戲喇！嗯嗯，計毛毛話，佢仲好睇過啲桃花囉。

有報道仲話，唔知係因為有曳曳同胞爬樹翻牆定折斷啲桃花呢，呢棵可憐嘅桃花樹，就R.I.P.咗喇……

不過毛毛諗，咁有質素嘅同胞，又點會咁曳豬呢～話唔定佢哋都係擔心啲監獄員工受到遊客打擾，所以先學日本個農民推倒「哲學之木」咁做，情願忍痛一拍兩散嚕～

封面圖片、資料來源：中國評論新聞網

延伸閱讀：【北海道哲學之木】太多攝影師朝聖 農民寧願一拍兩散