曾經，毛毛向女神講過，咩都可以為佢做，點知佢好老老套套咁話要毛毛摘天上嘅星星畀佢……好！為咗表示對女神嘅真愛，毛毛連成條銀河都可以摘落嚟！

好明顯毛毛就係想學古裝片啲兵仔咁懶浪漫用盆水反射粒星畀女神啦～嗱，水入面一閃一閃小星星，是咪好似有條銀河咁呢？呢排好多攝影發燒友都去咗石澳、西貢、將軍澳等等地方影「藍眼淚」，係咪聽個名都覺得路mantic呢？

呀，咁到底「藍眼淚」係乜東東呢？其實係一種叫夜光藻嘅海藻類生物，佢哋遇到海面潮浪就會發出藍光，雖然係好靚，不過其實係水質污染嘅警號嚟㗎，真係既期待又怕受傷害……大家影藍眼淚嘅同時，都要諗下點樣可以改善環境呀！

頭先都講咗啦，夜光藻要受到刺激先會發出藍光㗎嘛，所以有啲冇耐性嘅後生仔為求影靚相，會拋石仔落水刺激佢哋，但係咁樣會破壞環境，甚至嘈到住喺附近嘅居民㗎！其實想影到靚靚藍眼淚，趁退潮嗰陣影就fit晒喇！要影大自然，首先就係要學識愛護同尊重大自然呀嘛，知唔知？知！

封面圖片來源：The View Finders

資料來源：香港風景攝影會、The View Finders

延伸閱讀：【緊急呼籲】唔好再爬上大東山石屋喇下