嗱，農曆新年都過咗兩個月喇，等毛毛考下你哋有冇記性先，今年係咩年呀？唔記得？使咪畀啲貼屎你哋呀？

見到呢隻傻狗狗，應該記得喇啩！冇錯喇，就係猴年呀！唔知呢隻狗狗是咪想趁猴年化返個馬騮裝應下景呢？竟然畫到自己個面珠仔紅晒都有嘅？

佢主人話呀，有一日買咗枝紅色墨水筆返屋企，點知無啦啦唔見咗喎，於是就搵呀搵呀搵呀搵，搵搵下，就見到隻狗狗咁嘅樣樣喇……

狗狗，唔好諗住擺個無辜樣出嚟就可以當冇事發生喎，你有冇照下鏡呀，紅都面晒咁樣樣，一睇就知係你偷咗枝墨水筆去當胭脂咁搽啦！

毛毛真係估唔到原來而家啲狗狗咁貪靚㗎喎，嗰隻傻狗狗就搽胭脂，呢隻戇狗狗就偷食唇膏！喂喂喂，唔好諗住頭耷耷眼濕濕咁就冇人知係你做㗎喎！

封面圖片、資料來源：PTT