細細個有啲咩唔見得光嘅嘢，好似零分嘅考試卷，用咗成份零用錢偷偷哋買嘅漫畫，仲有女神唔肯收嘅情信……毛毛都係將佢哋攝晒落枕頭底，搏阿媽摷唔到㗎！雖然每一次，都會發現佢哋畀人放咗喺枱面……唉，其實呢個世界上真係冇嘢暪得過班女人，好似呢位日本網友咁，就畀佢個家姐起晒個床下底喇！

是咁的，話說佢家姐一直都好奇怪自己個正值青春期嘅細佬，床下底到底收埋咗啲咩，於是有日佢終於鼓起勇氣，趁佢細佬唔喺屋企嘅時候，靜靜雞咁走咗入細佬房，要打開呢個潘朵拉的盒子！

媽，為什麼不是我想像中的這樣？呢個遊戲王卡池真係震驚宇宙13億人喎！阿細佬你個床下底竟然係收埋呢啲嘢，果然口味毒特，有前途呀下！

不過亦都有網友話，呢堆遊戲王卡其實只係掩飾，真相其實就收埋咗喺呢埋卡入面喎……老老竇竇，畀返啲私人空間畀細佬得唔得啫！唔通細佬踢爆返你平時喺屋企素顏個樣又得喇喎！

圖片來源、資料來源：riko_riko0106/twitter