【毒L識食】自家製撈撈冷麵

熱辣辣熱辣熱辣辣好熱好熱~天氣咁熱,真係食乜都冇胃口呀,不過食撈撈冷麵又唔同講法!凍凍地又重口味,諗起都濕晒呀,個咀。話時話,大家有冇聽過一個都市傳說,話撈撈冷麵有一條條白色蟲仔先,毛毛就未見過喇,都唔想見,但係天時暑熱,啲撈撈材料唔夠新鮮就唔係幾好啦,不如試下自己整囉?

好喇事不宜遲,講下材料先:雞蛋六隻糖呢兩茶匙仲有啲橙皮𠻹……呢堆就唔使喇,你需要嘅有冷麵、芋絲、八爪魚仔、中華沙律,或者鍾意其他配料好似螺肉呀蜆肉呀栗米呀蟹柳呀咁都冇話唔得嘅。醬料就有冷麵汁啦,如果冇都可以用豉油蠔油嘅,仲有當然唔少得重口味之王道:蒜蓉啦!

世上所有冷淡嘅情侶,都有過熱戀時期,如果你睇得透呢個道理,就會明白,所有冷麵,都曾經經歷過熱水……即係首先淥熟啲麵同芋絲,再用凍水過冷河咁囉。

跟住就可以將撈撈配料同冷麵擺埋一齊喇,整整齊齊係咪好靚呢,不過毒L如你同毛毛都深知道,整齊並唔係我哋追求嘅境界!

所以我哋要將撈撈冷麵放入風車旋轉型自動攪豬機大撈特撈!如果你不幸地冇呢部機,就唯有人手撈啦。

食撈撈冷麵嚟講,用碗食又點食得出個風味來呢?識食一定係就算自己喺屋企整都照用膠袋食!食完之後,包你成個人都「好識撈」呀蝦蝦!

毛記電視網站 · 版權所有 · 不得轉載 Copyright © TVMOST.COM.HK All rights reserved