近排行出街，明明係晏晝三四點喎，點解會一街都係學生哥嘅？乜唔使返學咩喂？呀毛毛醒起，原來一年容易又暑假喇。自從返咗工之後，暑假就同春青小鳥一樣一去不回頭，不過都唔使灰嘅，古乳有暈，懷緬過去常陶醉呀嘛，不如就一齊數下有咩學生時代嘅夏日回憶，偷偷喺心入面熱血一下啦。

1）瘋狂游水

只需感覺～不要防曬！無論去泳池定沙灘都好，夏天都冇理由唔落下水嘅。明明唔識游水，但同幾個FD子浮喺水面，望住個天，講下將來，浮下浮下，咁又一日。

2） 踩單車

無講你踩開大圍、大埔、馬鞍山定其他地方，吹住風咩都唔使諗起勁咁狂飛車個感覺真係好爽！不過最爽應該係成班同學仔去，借啲意可以車埋你暗戀個同學呀嘛。

3）唱K

話明放假，唱通K是常識吧！成班同學仔發晒癲懶係熱血咁唱《全身暑假》呀《不要防曬》呀呢啲暑假必唱歌，諗返都好kai，但又好懷念。

4） 去FD子屋企hea

又唱K又行街睇戲，話明仲係學生哥，邊有咁多錢玩足成個暑假呀？冇嘢做，踢對拖過老死屋企，可能係去打機，可能係去播DVD睇，甚至無聊到幫佢執房，做咩都好，總之就係要同好朋友黐埋一齊。

5）上興趣班

可能係自己突然良心發現，想學下啲平時喺學校接觸唔到嘅嘢啦，都可能係畀阿媽迫啦，成世人流流長，總會上過幾次社區中心嘅暑期興趣班，而結果都一定係，未放寒假已經唔記得學過啲乜。

6）去Camp

又男同學又女同學咁約埋一齊咩住個大背囊去渡假屋玩返晚真係好青春！喂喂喂唔好諗歪呀，日頭就去海邊玩，夜晚就返去BBQ再打牌直落，講揭尾故同玩啤牌更加唔少得啦，玩到攰就齊齊迫埋喺嗰兩張床度。有嘅，就只有好pure好true嘅友情。

7） 補課

放暑假呢個幾月，最慘慘豬都係會考班（唔好鬧毛毛…當年毛毛真係考CE）要返去補課喇！不過唔緊要啦，咪當成班同學咁耐冇見聚下舊囉，返到去真係吹水多過聽書！最緊要係可以一解對暗戀同學嘅單思之苦呀嘛。

8） 亂做＋抄功課

唔好以為毛毛淨係識得玩呀，作為一個勤力嘅乖學生，學業要緊，我會小心，點會唔做功課呢？只不過係8月31號先開始做咁解啫……一個唔小心約咗損友last day 都去玩盡佢，咪1號先返去抄囉。

9） 買賣二手書

一清咗locker就返屋企用擦膠起勢咁擦擦擦擦擦，務求將本三手書擦到好似新書咁乾淨，再拎去二手書店度放！放得嗰10蚊轉頭又幫襯佢買返本100蚊嘅二手教科書，嗰刻真係好想唔讀書，開返間二手書店賺錢算喇。
（Btw想當年轉制，乜書都放唔到，真係好sad。）

10）去書展同動漫節

就算你平時唔睇書唔睇動漫都好啦，暑假同同學去約埋一齊去書展同動漫節簡直係盛事中嘅XO！如果你係住新界九龍嘅話，要去到老摙咁遠，直頭有啲旅行feel，要plan定去完會展喺港島區有咩玩有咩食先得！