執屋大掃除最開心係咩？唔係見到屋企乾淨晒，而係一路執，一路睇返以前嘅嘢，啲回憶真係baba聲咁湧出嚟呀！好彩嘅話，仲可以喺啲衫袋褲袋度摷到n年前順手塞落去嘅錢?！不過呢位台灣網民就仲勁，事關佢執執下屋竟然執到阿爺留落嚟嘅秘笈呀！

呢幾本嘢發晒霉咁，一睇就知歷史悠久啦！原來呢位網友嘅太爺同阿爺都係做中醫師嘅，呢幾本中藥秘笈就係咁樣一代傳一代，足足有百幾年歷史，仲老過毛毛同你呀！

雖然毛毛唔識中醫藥，但係見到入面啲字密密麻麻，仲要係一筆一筆咁寫成，真係有衝動想拎去逐頁逐頁過膠鑲起佢呀！

不過最估唔到嘅係，原來七孔流血都有得醫㗎……

咁毛毛下次畀腦細鬧到七孔流血嘅話都冇有怕，可以繼續開工啦！跳起yeah！Between，咁搞法，會唔會揭揭下連如來神掌呀、九陰真經都出埋嚟㗎？

圖片來源、資料來源：‎Helios Chen