《千與千尋》呢套動畫，毛毛有啲位唔明，但毛毛不說，好彩有位日本網民寄信去《千與千尋》嘅創作公司－吉卜力工作室，好好奇咁問：「究竟爸爸食咗啲乜搞到變豬？」，結果收到2頁紙嘅回覆。

吉卜力解答話，爸爸所食嘅係異界入面，一啲好奇異、睇上去好好食嘅食物，不過就唔係食一啖就即時變咗做豬，而係溫水煮豬咁，慢慢、慢慢咁變喎！

吉卜力再解畫，話《千與千尋》其實係講緊日本喺經濟泡沫時期，有啲人只係識得話經濟唔好，但又乜都唔做，變到好似豬咁，肚餓就只係識話飼料唔夠。

至於千尋呢個角色，宮崎駿就話希望現今社會嘅人可以好似呢位平凡嘅少女咁，喺人哋變成豬嘅時候，可以搵到拒絕被同化嘅力量，勇敢面對危機，就會發現到連自己都估唔到嘅適應力同忍耐力，發揮出智慧而得以生存。

封信最尾一句，吉卜力就好客氣咁話：「係咪好難明呢？請你以後繼續支持吉卜力嘅作品，多多指教。」

咁認真嘅工作態度真係值得學習下！所以，毛毛要放低手頭上嘅工作，即刻睇多次《千與千尋》先！

資料來源：＊のんたろす＊/Twitter

封面圖片來源：動畫《千與千尋》