唔少妹豬都覺得青靚白淨oppa再加埋又pure又true嘅內心係男神之選，但閱仔經驗無數嘅毛毛就覺得表面上粗粗魯魯麻麻甩甩嘅大男人加埋溫柔細心嘅內在，嗰種反差萌先係冇得輸喇！

哪有鐵漢柔情呀你老……唔好老住先！呢度真係有呀！美國有個地盤佬Jason Haney，咁啱喺正一間兒童醫院隔籬做緊工程，知道班小朋友日日困喺醫院會好悶，所以特登同佢乖女一齊整咗8呎高嘅Wally紙牌，同小朋友玩現實版Where’s Wally呀！

Jason Haney將巨型Wally擺喺地盤唔同位，等小朋友可以慢慢搵，解下悶～佢仲開咗個facebook，等小朋友搵到Wally之後可以up相上去show下成果，跟住佢就會再擺Wally去第二個位㗎喇！要返工已經夠晒攰，佢仲花咁多心思同病童玩遊戲等佢哋冇咁悶，真係好有愛！
（Between雖然佢facebook係叫「Where's Waldo」，但原來Waldo係美國叫法，同我哋叫開嘅Wally係同一個四眼仔。）

聽人講心情好，身體都會好啲，希望班小朋友感受到呢位叔叔嘅愛，會快啲好返啦！

邊個話地盤佬一定粗粗魯魯㗎，其實佢哋堅係真漢子大表代！嚟，識唱嘅朋友一齊唱！成和敗努力嘗試！做個真的漢子！迷人是這份情意！ 

封面圖片、資料來源：Where's Waldo.. Memorial Children's Hospital