喺香港最常見到嘅野生動物，肯肯定係周圍飛嘅麻雀仔！佢哋細細隻、眼大大、圓碌碌咁，都幾打耳㗎，不過最近竟然有網民發現有人用膠水黐實麻雀仔？！

呢位網民話，喺土瓜灣發現有隻麻雀仔畀人用勞作膠水黐實喺地下，搞到甩晒毛呀。佢見到之後就救起隻雀仔幫佢清理再放返生，不過雀仔就似乎飛嘅時候平衡唔到喇……原post入面話「有一種危險生物叫小學生」，不過毛毛同呢位好心網民傾過，佢講返其實唔清楚係唔係小朋友做嘅，只係見到佢哋喺地下撩隻麻雀仔。

佢仲話，之前已經見過一次有小朋友用球拍打白鴿，希望大家見到小朋友做類似行為嘅時候可以即刻阻止。其實大人細路都好應該愛護動物！試下調返轉頭諗，你無啦啦一身膠水黐到甩晒毛，或者畀人打，你都會唔開心啦！

之前藍奕邦屋企窗外有雀仔築巢，引起佢樓下嘅住戶擔心衛生問題要求拆巢，不過漁農署人員去到佢屋企視察之後，從保護雀鳥角度認為冇需要拆巢，業主立案法團都同佢達成共識等佢返香港證實雀巢已經空置先再進一步處理。點知上星期就有人由樓下單位用長棍伸上嚟強行拆巢……唉，唔通香港連少少大自然生態都容不下？

封面圖片、資料來源連結：Fredrick Lau／香港雀鳥交流及買賣、藍奕邦