露營露到去北歐，感覺到底係點？

露營愛好者Martin、Molly呢對小情侶，除咗喺香港找尋「大自然聊天室」之外，日前更加孭住背囊飛到去北歐，紮營紮到北歐。

任何關係，最緊要都係溝通。溝通係人與人之間嘅橋樑。

溝通，除咗講渠道，亦都講溫度。兩個人面對面講嘢，呢種溫度，好難喺其他渠道搵到。

「露營係一個好好嘅溝通環境」－－Martin

Martin、Molly相識四年，拍咗拖一年半，兩個人重視相處，但相處方式同一般情侶有少少分別。

「我哋唔傾電話，又好少出街嘅」－－Molly

講電話、睇戲、行街呢啲情侶標準動作，佢哋一向甚少。取而代之嘅係見面，面對面傾偈嘅方法。

「我哋好多嘢都會傾㗎，對唔同嘢嘅睇法啦，其他情侶喺唔喺咁㗎？」

呢份純真無邪，由拍拖次數屬於戀愛初哥級別嘅Molly講出，其實相當有說服力。

戀愛同溝通分唔開。

兩個人喺大學階段接觸露營，一次浪茄灣露營嘅時候，佢哋仲決定喺埋一齊。兩人一齊露營嘅次數高達三十幾次，高峰時期更加可以一個月去兩次。

拍拖一年之後，兩人衝出香港，去到挪威、冰島、丹麥、瑞典露營。

北歐之旅係Martin嘅畢業旅行，亦都係為咗實現「好想去冰島露營」呢個小小心願。

情侶之間無鬧交就假嘅，兩個人相處或多或少都會有意見不合嘅時候。尤其露營期間，孭住個廿幾三十公斤嘅背囊，加上陰晴不定嘅天氣，好難唔影響到心情。

期望，往往同現實會有差距。

「喺北歐期間，都有過一次小小嘅爭執。」

Martin係放任自由派，主張去到先諗；Molly係腳踏實地派，為咗捉緊北歐「悠閒」嘅交通schedule，一定要事先編定好行程。Molly想男朋友幫手諗行程，「點知轉個頭問佢，佢竟然話『無諗喎！』，激到Molly都有啲啲嬲。

講起鬧交，又諗返起香港嗰時：有一次，賢良淑德嘅Molly幫手「set營」，意外整爛咗Martin新買嘅帳篷骨架。「新玩具」落地就畀人整爛，比著你都會唔高興啦！

又有一次，夏天三十幾度熱到Molly就快暈，佢好想掉頭走返屋企，Martin堅持要去，搞到兩個人冷戰咗成晚。

「我哋鬧完交都會攞出嚟講嘅。」

Martin呢句說話證實咗，當兩個溝通得多咗，其實價值觀可以拉近好多。

回憶不會風化

「佢唔係體貼嘅人，佢只係好照顧我咋。」－－Molly

到達冰島嘅時候，兩個本來打算踩兩日一夜單車，去到冰島教堂山－－Kirkjufell。

兩個人都好希望登上可以完成路程，無奈現實事與願違，Molly因為體力不繼，無辦法繼續。Martin無怪責Molly，無拋低女朋友一個自己登峰，更重要嘅係佢願意放棄其中一個旅行目標，陪住另一半。

又問到兩位認為旅行中邊個行程最難忘，兩個人不約而同咁答，喺挪威三大岩之一嘅「巨人之舌」Trolltunga。Molly同Martin雖然不斷稱讚巨人之舌有幾靚，靚到筆墨點樣難以形容，而活喺佢哋世界外嘅毛毛覺得，佢哋呢種不自覺嘅默契，先係神奇到難以形容。

整篇訪問，Molly同Martin畀嘅答案真係有九成相似，唔講以為佢哋自己夾過?呀！呢啲應該就係默契，而呢種默契，相信係由一次又一次嘅旅程中，喺大自然自由自在嘅環境下，一點一點咁培養。