動畫/卡通，永遠都係咁好睇，就算我哋大個咗，仍然可以令到我哋笑、令我哋喊，以下呢幾個畫面，包你喺咩時候睇都會覺得好洋蔥，即刻想拎張紙巾抹下啲眼淚。

（利申定先，毛毛扮工能力有限，不能盡錄，幫下手自行補充。）

1. 《沖天救兵》

一開場嘅公公婆婆，細細個就有拖拍，仲結埋婚，白頭到老，這些機會⋯⋯真係唔屬於毛毛。最後婆婆診斷出生唔到小朋友，兩個人仍然不離不棄，最後喺醫院道別，公公永遠懷念婆婆。

2. 《STAND BY ME：哆啦A夢》

哆啦A夢加保全叔嘅配音，加上一句：「我唔可以再留喺度，真係要走喇！」，令我哋發現，自己原來就係永遠需要哆啦A夢喺身邊嘅大雄。唔係大雄唔夠獨立，而係哆啦A夢已經係成長嘅一部分。就算幾大個都係。

3. 《數碼暴龍 01》

一齊作戰咗咁耐，最後都係要分開，一班主角同一班數碼暴龍揮手告別。巴魯獸跌低，主題曲《Butter-Fly》播起，即刻跟住喊出嚟⋯⋯

4. 《寵物小精靈: 超夢夢反擊戰》

唔忍心見到小精靈互相殘殺，小智用自己個身保護佢哋，結果變咗石頭。比卡超即刻走去佢隔籬想整醒佢，雖然明知主角一定唔會死，但都會幫佢哋打氣。

5. 《OnePiece》

由東海到偉大航道，梅利號載住路飛一行人上天下海。經歷空島十九幾萬呎高空嘅旅程之後，梅利號嚴重損毀。喺一輪掙扎之後，路飛決定將梅利號燒毀，畀佢重返大海。喺最後嘅時刻，梅利號嘅船精靈仲喺船裡面仲走出嚟同大家道別。

6. 《反斗奇兵3》

Andy大個仔，唔再玩玩具。胡迪巴斯佢哋畀奸玩具所害，即將要「被消失」，但佢哋決定拖住手，就算死，都要一齊面對。好彩佢哋最後走得甩，而Andy好唔捨得咁將呢班朋友送畀人，喺告別之前，Andy同佢哋一齊再玩多一次⋯⋯鳴鳴。Btw，自從睇咗反斗奇兵，就成日覺得啲玩具識郁，佢哋唔係死物，係好朋友。

7. 《全職獵人》

唔使多講，《全職獵人》最感人一定唔係情節，而係每次富奸宣布再次連載，只可惜，好快又再停刊⋯⋯每次諗起可以要個孫，甚至係個孫個孫燒畀自己先睇到結局，你話啲眼淚又點忍到唔流出嚟呢⋯⋯

話時話，毛毛已經喊緊，因為好掛住一放學返到屋企，校服都未除就坐喺電視面前睇卡通嘅日子。

封面圖片來源：

動畫《衝天救兵》、《寵物小精靈: 超夢夢反擊戰》、《STAND BY ME：哆啦A夢》、《數碼暴龍 01》、《OnePiece》、《反斗奇兵3》、《全職獵人》截圖