毛毛見識少，原來香港依家都仲有人行船，仲要係一位90後。

問：咁究竟「船」又係點「行」呢？

答：Hea得嚟又辛苦咁行。

Tom，二十四歲，有一年半嘅行船經驗，試過兩次為期九個月嘅水上大長征。

呢九個月，Tom隨船去唔同地方，由亞洲到美洲，再到非洲，喺好多你連名都唔知嘅地方，不斷上貨落貨，留低一條條嘅腳毛，見識海上嘅世界。

Tom之前就係屬於甲板部嘅實習生，每日工作八個鐘，四個鐘做維修保養、四個鐘喺駕駛艙學下嘢。

其餘時間都可以自由活動，喺簡陋嘅健身室做下運動、喺房到溫書同攤唞下。

最危險嘅地方，就係最安全嘅地方。喺駕駛室前嘅甲板上偷懶，反而唔會畀船長捉到。

不過，Tom表示並非每日都咁輕鬆，忙起上嚟連踩十九幾個鐘都好閒事。

問：有冇遇過咩危險嘅事？例如⋯大白鯊？

答：第一次行船，簡直大L鑊⋯⋯

Tom發現原來船上工作比想像中辛苦更多，本來都有一刻想唔做，但心諗「冇理由咁㗎嘛⋯」同「喺海中心點樣樣辭職？」，令佢捱過咗九個月。

除咗船上工作之外，當船泊岸時，Tom要做「貨物瞭望」，監管碼頭工人嘅工作情況，確保運送嘅貨物完好無損。

而且，潮汐漲退時，又要控制船纜鬆緊，等架船可以安穩停泊。

問：離開香港咁耐，有冇掛住屋企人先？

答：不要說了⋯⋯

行船除咗要捱辛苦、捱悶之外，仲要捱好貴嘅網絡。

「平時我哋百幾蚊無限上網已經覺得貴，但喺公海上網要畀成1蚊美金，先換得1MB數據。」

秒秒都係錢，只會用嚟同家人朋友聯絡。

「但比起錢更心痛嘅係，成個星期冇上網，諗住睇下WhatsApp，但原來冇人搵過自己。我本身都唔信㗎，不斷refresh部電話...」

呢個故事真係聽者傷心、聞者流淚，毛毛相信大家都明白Tom嘅感受。

問：咁生理上呢？有冇咩問題？

答：細細聲話你知，唔好同人講⋯⋯

「便秘亦都係船員嘅天敵，曾經有船員十幾日都痾唔到屎，搞到要入醫院先解決到。」

船員所有食物嘅份量同種類，都係由船長同大廚控制，雖然唔會入漏咗蔬菜，但蔬菜唔夠兩星期就會壞，所以船員要不停同大腸搏鬥。

「每次食飯，我都好掛住香港嘅燒賣啦、魚蛋啦、牛肉球啦...」

大廚係來自菲律賓，所以早午晚餐，Tom都要食較油膩嘅煎炸食物。一開頭大廚都會有啲心思，但慢慢每餐都食埋一樣嘅餸，所以九個月食差唔多嘅食物都係一種考驗。

問：老老竇竇，海中心工作嘅感覺正唔正？

答：好L正⋯原來世界係咁大！

一直喺香港長大嘅Tom，鼓起勇氣，嘗試一份比較特別嘅工，為咗可以跳出香港，見識下呢個世界。

「喺海上嘅夜晚，一出甲板就好似見到成個銀河咁濟，從未見過咁多星星閃下閃下。」

原來，冇高樓大廈嘅天空係咁廣闊、一望無際嘅大海可以咁藍，一切都好似離我哋好遠。

「家人朋友都話辛苦、危險，叫我唔好做，不過，我都會選擇留喺呢一行。」

「當初會揀呢份工，首先係因為我性格比較內向，行船可以自己一個自由自在，咩都唔使理。仲有，我覺得『船』真係好得意㗎！每一架都唔同，揸法又唔一樣！」

行船要離鄉別井，但Tom好享受喺大海上工作呢份平靜，同埋船上工作帶畀佢嘅挑戰性。

當中，最大嘅挑戰性就係－佢係唔識游水。

不過，Tom好樂觀咁諗：「橫掂有咩事都死L梗，問題都唔大！」

即使考慮到人生仲未出現嘅女朋友，Tom表示都唔會放棄「行船」呢份工。

問：講真，「行船」好唔好搵先！

答：問呢啲⋯兩皮幾一個月囉，多唔多過毛毛你先？

因為鍾意，所以堅持；因為想見識世界，所以行出本來嘅世界。

原來，天可以好藍，Comfort Zone嘅外面，係更加Comfort。

＃毛記專訪 #90後行船環遊世界