【係愛呀】主人見我老游唔到水 整救生衣畀我呀!

成日都聽到啲人話做魚好過做人喎,咁又係,日日唔使返工,就係個缸到游嚟游去等食,仲有專人服侍你幫你換水喎。不過,如果一條魚唔識游水,咁同一條浸喺水度嘅咸魚有咩分別!好似呢條23歲嘅老魚Sally咁,就已經老到游唔郁喇。

圖片來源:Aidan Cramer /Youtube

正確啲嚟講,Sally係浮唔起,只可以名副其實成條死魚咁,喺個水底郁吓郁吓。作為一條沉底嘅魚,唔好話游嚟游去,游上水搵食都難呀!唔通呢位老友記真係要喺水底等死?

圖片來源:Aidan Cramer /Youtube

好彩Sally有個好主人,幫佢設計咗件「魚堅尼」呀~其實只係用咗一條比堅尼帶同埋一個木塞,將佢哋綁好之後,用自己嘅方式將件衫著喺Sally度,理論上就可以幫Sally 平衡同浮起,咁佢就游得返水喇。其實主人都失敗咗好幾次㗎,不過學麥兜話dry,失敗乃成功嘅母親,努力係成功嘅父親呀嘛~

圖片來源:Aidan Cramer /Youtube

喺主人嘅努力下,手術好成功,病人唔單只冇瓜到仲可以游得返水𠻹~上上下下、左左右右都難佢唔到呀!換轉好多人,見到條魚咁,都可能放棄咗佢喇,但其實你肯花少少心思嘅話,就可能救得返一條生命㗎喇!不過好似毛毛呢種養咩都死嘅人,睇嚟都係去養返鯉魚王罷喇。

封面圖片及資料來源:Aidan Cramer /Youtube
延伸閱讀:【係愛呀】金魚哽石仔 主人使500蚊美金都要救返佢

毛記電視網站 · 版權所有 · 不得轉載 Copyright © TVMOST.COM.HK All rights reserved