好多小朋友都唔鍾意食魚嘅，不過毛毛就醒目喇，最鍾意就係食魚！魚肉又滑又有營養，食得多皮膚都靚啲呀。有幾鍾意？都係一次過食百幾二百條咁啫，都唔算好誇張呀？

講緊嘅唔係大魚，係細細條嘅白飯魚呀傻豬！就算係食平嘢，都可以好有要求㗎，一定要拆骨起肉先食！咩都咁隨便，點會有人畀面呀，唔拆骨一陣傷到我嬌嫩嘅喉嚨點算！

喵星人表示：唓好叻咩，朕一出手…呀正確啲講係手都唔使出呀，用條脷咋，都可以拆骨啦！條骨留畀你啦奴才，補鈣呀喵！

話時話，白飯魚係就係撈飯一流，不過其實佢哋唔係「長唔大嘅魚」，而係「冇機會長大嘅魚」，啲魚仔出世冇耐就畀人捕撈上岸，會大大影響海洋生態㗎。人類唔食白飯魚唔會有咩影響，但白飯魚就係好多海洋生物嘅食物，唔想第日冇魚可撈，大家就知點揀食咩魚啦！

封面圖片、資料來源連結：黃咪匠、黃姿榕／貓咪也瘋狂俱樂部 CrazyCat club、生態巴士