老老77，有得揀嘅話，有邊個主人唔想帶埋自己嘅寵物一齊去旅行再瘋狂同佢哋影相呃Like吖？不過動物空管咁嚴，申請得嚟你都去完旅行返嚟啦！而意大利有個靚女主人就為咗同狗狗旅行，決定唔搭飛機，用自己嘅方式出走！

個方法之唔係將架van仔改裝成露營車，然後揸住佢四圍去囉。

不過架van仔咁細，係咪真係得㗎……得！點解唔得？你哋見啲女人連衣櫃呢個咁細嘅地方都可以放到你意想不到咁多衫，你哋就知女人善用空間嘅小宇宙係幾超乎你想像啦！

首先，呢位靚女主人清空司機位後面嘅空間，再自己鋪木地板同砌傢俬，實行自己的床自己砌！

嗱嗱嗱，麻雀雖小，不過五臟俱全。唔止有張靚床，仲有埋個爐頭畀你玩煮飯仔，加埋啲LED同裝飾真係好有家嘅感覺呀！比起香港啲百幾呎豪宅一啲都唔輸蝕～

btw，可能你哋會問，點解唔直接揸架van仔，去到目的地再瞓酒店咪得囉？喂講就易，但係要搵到間可以畀佢同狗狗一齊住嘅酒店就難喇！主人為咗帶狗狗去旅行，所以幾辛苦都冇所謂囉！都係嗰句，最緊要狗狗瞓得舒服呀嘛～

其實呀，幸福嘅又點止係狗狗吖～話晒好旅伴難求，女主人有個咁好嘅partner陪佢上山下海同沿路保護佢，而且狗狗仲肯畀佢影相放上挨豬呃ike?！計毛毛話，最幸福嘅係女主人就真！

封面圖片及資料來源：Boredpanda