「Let it go~ Let it go~」到今時今日天氣凍親都忍唔住想唱下呀～見到Elsa整個Olaf咁打耳，真係好想整埋一份呀，可惜香港唔落雪啦～日本就唔同呢，一到落雪嘅時間，大家都會發揮創作力量同幻想砌出唔同造型嘅雪人，連Olaf都要企埋一邊呀！

呢個咪係《銀河鐵道999》個「千年女王」？「長長頭髪、兩眼似星光呀嘛」，咪啱囉～呢個好似千年女王嘅美達露係用雪砌出嚟㗎。你睇佢幾有仙氣，真係由內至外散發出一種「冷」艷呀！連五官同啲頭髮都整得好標緻㗎。

最估唔到係呢個雪雕竟然係砌喺一架私家車嘅車頭度呀！不過，ching你咁樣喺人家架車度雕個咁精緻嘅人像係度，你叫車主開車定唔開車好呢？Well，唔緊要嘅，再靚嘅美達露都會有消失嘅一日㗎嘛，咁咪暫時做住《銀河汽車999》先囉，又唔係《高鐵列車689》，冇事嘅～

呢個美達露都係得半身啫～嚇我唔到嘅，但如果畀你夜晚見到呢個無臉男企喺度，咁係好驚定好驚喜呢？呢個無臉男唔止做得個樣似，你睇佢喺呢個冰涼嘅夜晚，一支公咁企喺度，簡直完全表達出毒L做兵做到變冰嗰種嘅悲哀呀。睇到呢度，你係咪隱隱約約有種共鳴呢？

封面圖片及資料來源：elimi_lime／twitter、okame747​／twitter