白天不懂夜的黑，香港人又點會明外國嘅冬天可以去到幾凍呀！今個星期終於都有返啲啲咁多冬天feel喇，不過其實都只係15度啫，熱慣咗嘅我哋已經要包到成隻傻咁喇，如果去到會凍到結冰嘅地方咁點算呀！

雀仔，天氣咁鬼凍做咩仲唔快啲返屋企呀？原來佢企緊嘅位係一個暖水缸嚟，會keep住發熱，等啲水唔會結冰，所以就吸引咗唔少雀仔嚟飲水喇。

你估呢隻雀仔想企喺㗎咩，其實佢係因為對腳仔結咗冰，黐實咗條鐵欄，所以先好無奈咁企定定喺原地咋……呢個咁混亂嘅身影，咪就係佢出盡力想飛又飛唔到嗰時影㗎囉……

有個好心人見到雀仔咁慘，就想幫下佢喇，但係夾硬扯起佢又驚會整親啵，點做好呢？伯伯首先用手包實雀仔，等佢冷靜下、保下暖，同埋建立下感情先～

老師話唔可以用口吹雞屁股，不過冇話唔可以吹雀仔腳腳啵！伯伯慢慢呵氣，融咗雀仔腳上嘅冰，你睇條原本凍冰冰嘅鐵欄接觸到暖空氣之後有層暇氣，就知雀仔有得救啦！

吹咗幾下，雀仔腳上嘅冰真係融晒，佢唔使再黐實條鐵欄喇！雀仔畀伯伯成功打救之後，就即刻飛上天，輕輕的走了，不留下一句多謝……唔好咁sad啦伯伯，話唔定佢係想即刻飛返屋企，叫埋成村雀一齊返嚟多謝你呢個大恩人呢！

封面圖片、資料來源連結：Nelson Wilson／YouTube

延伸閱讀：

【好人好事】雀仔腳爪畀魚絲纏住 沙田街坊一齊救返佢

【係暖男呀吱吱】電單車哥哥特登停車救雀仔

【唔L係啩】有人用膠水黐實麻雀仔？！