如果可以畀你擁有一種超能力,你會揀打極唔死、識飛、瞬間轉移、定係隱形呀?嗱,呢個笨唔係心理測驗,而係性別測驗,如果你揀隱形,而又唔係女性,就好大可能係男性!仲要係睇開日本片大嘅男性!
想變隱形人enjoy下透明人間就幫你唔到喇,不過扮有隱形人出現都仲得嘅!睇下呢條牛仔褲,企得幾直,幾咁硬蹦蹦,一睇就知係個男子漢大丈夫!
你都想玩嘅話,就要跟日本情景師荒木智學下嘢喇!佢話首先要睇下天氣報告,如果天氣先生話第二朝嘅氣溫會低至零下,就可以繼續去馬喇。之後就浸濕條牛仔褲,再打直掛喺屋外面,留意褲管唔可以疊住,要夠位著返隻腳返去,咁先逼真㗎!
過咗一晚,條褲應該已經凍到成咗精,可以企起身㗎喇。帶佢出街街,著埋對鞋,真係好似有個隱形人企喺路中心咁呀!想嚇死附近啲街坊咩!
超強情景師仲拍埋片,話畀大家知呢個透明人間係360度冇死角㗎!係咪心郁郁今晚都想返去試下整呢!
算罷啦,香港邊有咁凍喎。
【透明人間現る!】
— 情景師アラーキー/荒木さとし (@arakichi1969) January 15, 2017
寒波 + 晩に濡らして干していたGパンとその結果。 pic.twitter.com/iI02bKcpIh
封面圖片、資料來源連結:arakichi1969/twitter