主人帶親狗狗去散步，多數都係去屋企附近嘅，因為去得遠就要煩交通問題呀嘛，不過相信狗狗心入面其實都好想跟實主人，一步都唔行開㗎。日本有個主人就成日帶埋佢隻柴柴Yu出門，一齊去唔同地方嘅～

Yo！出門口喇，真係未出發先興奮呀！不過柴柴你點解咁快就開始攰咁嘅？係咪前一晚知道有得出街街太開心，搞到瞓唔著呢？唔怕啦一陣上車就可以瞓返陣㗎喇～

終於到達目的地喇，柴柴你睇下今日幾好天！快啲影返幾張靚相啦！

……喂，又瞓？係咪頭先喺車瞓咗陣，而家仲未醒呀？行幾步就會醒神返㗎喇，Go go go！

上到山頂喇柴柴，呢度風景好靚呀！

……下你又瞓呀？應該都係因為行上山太攰，所以先休息下啫，主人唔會話你懶嘅，55。

唔該你快啲起身行啦，周圍啲路人都望住我喇，一定心諗我呢個主人唔識教仔啦，真係好尷尬囉大佬……

好喇喎你！明明上次係你話想出多啲街見下世面，廢事同其他狗狗食tea嘅時候畀狗笑你淨係識睇都市閒情㗎嘛！而家同你出街又去到邊瞓到邊，到底想點啫！瞓啦瞓啦返屋企瞓飽佢啦！

柴柴表示：好啊主人～我哋返屋企慢慢瞓啦汪汪～！

哎呀，唔好咁嬲啦主人，其實柴柴唔係懶惰，佢係想話畀你知，無論去到邊，佢眼中最重要嘅風景都係你啫，應該。

封面圖片、資料來源連結： always_with_yu／instagram