喵星人嚟到地球，最大目的就係征服人類，要做到呢一點，梗係要深入佢哋屋企，方便監視人類一舉一動啦！不過流浪喵星人可能覺得冇理由無啦啦爬入人哋間屋度啦，所以就會喺街上等待目標出現，再重搥出擊喇！

日本有個哥哥仔有日喺街頭遇到隻喵星BB，成為咗被選中嘅目標呀！呢隻喵星人雖然只係BB，不過作戰力同求收養嘅決心就好強。佢開頭見到哥哥仔，就圍住佢腳邊行幾步，用條尾撩下佢，試下反應先～

點知呢個哥哥仔似乎不解溫柔，喵星BB唯有拋個身出嚟，去到盡！佢攬實哥哥仔隻腳係咁爬呀爬，一口氣爬到上大髀都唔肯停，仲爬埋去兩隻大髀中間?！睇嚟佢招攬唔到呢個奴才唔會罷休喎！唔知喵星BB當哥哥仔係樹，定當咗自己係樹熊呢？

可能喵星BB爬到去兩隻大髀中間，搞到哥哥仔有啲面紅啦，所以哥哥仔就一手抱起佢喇～嗚呀，唔通真係得米，畀佢成功做到主子？雖然喵星BB睇中咗呢個哥哥仔，不過好可惜佢已經養緊狗狗，唔可以養多隻貓貓喇，所以最後都係冇帶到喵星BB返屋企。喵星BB，你咁得意又咁識氹人，希望好快就有人做你嘅專屬奴才啦！

野良の子猫に懐かれてしまった pic.twitter.com/PuDYJRSPEp

— アサクラククリ (@kamisori06) January 17, 2017

封面圖片、資料來源連結：kamisori06／twitter