啲愚蠢嘅人類成日以為主子想阻住奴才做嘢，其實係主子見你出去賺錢買罐罐畀佢咁辛苦，先賞賜你摸下佢嚟減下壓，咁先可以繼續畀心機做嘢，買多啲高級嘅零食返嚟㗎嘛～你哋啲人類仲唔感恩！不過有時見到啲奴才做嘢咁冇用，為咗罐罐著想，就連主子都忍唔住要出手喇！

唉，你哋啲奴才，壞咗部提款機就喺度大驚小怪，唔使驚，有朕喺大廳！等主子用佢柔軟嘅身體爬入部ATM度睇下咩事啦！主子深入虎穴，好快就搵到個問題喇～

「同朕check下有冇士啤零件，跟住叫奴才同我換咗佢！」 

都話喵星人係高智慧生物嚟㗎啦～唔止識整ATM，仲預知部printer有一日一定會冇墨，所以坐定定喺度唔畀你啲人用呀！梗係唔係因為部機暖先坐落去啦，主子似係啲咁嘅貓咩喵～

「啲奴才點做嘢㗎，咁耐都未拎啲嘢過嚟換，朕都係瞓陣先喇！」

唉，而家啲貓奴咁唔醒目，主子又點放心畀你哋自己做嘢呀～難怪主子成日想跟埋奴才返工啦，不過主子，你咁叻叻豬，畀你跟埋返去，奴才容乜易冇得撈㗎！你都係乖乖地專心喺屋企負責賣萌同畀奴才服侍啦～

封面圖片及資料來源：爆料公社