女人最可怕嘅時候，就係你明知自己瀨晒嘢，但佢仲同你講「冇嘢呀」、「我冇事喎」、「我冇嬲呀」⋯⋯因為你知道呢啲全部都唔係真話，如果你真係當佢冇事，你會仲會死得好慘?。唔好以為佢唔出聲，你就安全呀，有時整飯盒都可以係一種無聲控訴嚟……

日本有位老婆雖然自稱「鬼嫁」，即係同老虎乸差唔多喇，但係每日都會整愛心飯盒畀老公食，都算係咁啦～有條炸魚同納豆送飯都好好㗎喇⋯⋯因為，大部分嘅時間，做老公嘅只要睇到個飯盒，就知道又出事喇！

用海帶砌出充滿怨念嘅「ロウリュウ」，究竟老婆係幾想去焗「玄蒸」（類似桑拿咁啦）先會寫埋落個飯盒度呢？見到呢個咁強烈訴求，睇怕家用都要按照可加不可減機制調整下喇⋯⋯

死啦，今次做錯咩呢！得白飯同豆咁大鑊嘅？豆⋯⋯唔通係畀班豆釘激親？定係話家用太少淨係夠買豆呀！老婆表面證供就話係節分用淨啲豆，所以煮埋做餸啫，但啲豆用嚟驅鬼㗎喎⋯⋯咁係咪今晚叫老公唔好返屋企呢？

今日有冷麵食咁好？望真啲⋯⋯袋上面呢條咪十大令男友老公聞風喪膽嘅問題之一－「你知唔知今日係咩日子呀？」！ 呢條問題，稍為唔小心答，唔好話lun廚，連有冇命食下一餐都難講呀！係結婚週年？拍拖紀念？定係啜啜紀念呢？媽呀！好亂呀！

完全唔知發生咩事嘅老公，第二日唯有懷住必死嘅決心，好似拆彈咁打開個飯袋喇⋯⋯咦，得一袋飯同炸魚乾，好似冇事喎～梗係啦，因為老婆喺挨豬話⋯⋯其實老婆自己都唔記得噚日咩日子。嘩，老婆呢招高到呢⋯⋯

封面圖片及資料來源： d.aiyu／instagram