雞～全部都係雞～雞全部都係雞全部都係雞～夠喇！唔好再唱喇，得喇知喇知今年係雞年喇！雖然廣東人做雞嘅方法特別多，都唔使一行出街就周圍都係雞㗎？真係好悶呀，畀啲新意得唔得呀大佬！

想要新意？即到！平時啲花燈會都係得生肖同蓮花嘅啫，睇咗咁多年乜都悶啦～台中燈會今年就有盞鳳凰花燈喇，聽個朵都知又型又威又疊馬啦，仲好應節?！

雖然毛毛讀書少，未見過真正生勾勾嘅鳳凰，但係細個去酒樓都見過牆上面嘅金色鳳凰係咩樣，邊似得呢盞花燈咁尖挑鬼命㗎？呢隻擺明係尖叫雞嚟喎師兄……

整到隻鳳凰咁樣樣，擺明係未見過偽唐伯虎（即係堅．祝枝山）嘅大作「神鳥鳳凰圖」啦！學下嘢喇，大功告成！

呢幅神作失傳咗咁耐，估唔到會喺雲林虎尾台灣燈會度搵到呀！好強呀，竟然連隻雞仔……吖唔係，隻鳳凰個慌失失嘅神髓都還原到出嚟，再加埋個畫雞點睛嘅光圈，真係咩回憶都返晒嚟！唔講住喇，祝枝山應該唔係走咗好遠，毛毛要搵佢拜師呀！

封面圖片、資料來源連結：高弘達、神鳥鳳凰圖 vs 雞仔啄米圖

【係咪你呀祝枝山系列】

終於畀我見到傳說中嘅神鳥鳳凰圖喇！

咦！呢架咪係神鳥鳳凰戰車？！