而家一房難求，連做愛做嘅事都冇地方呀！你以為毒L就冇呢個問題？錯晒！冇位冇地方嘅話，咁佢哋啲珍藏放喺邊呀？對於一個視收藏如老婆嘅人嚟講，有得揀會送佢哋入倉咩，老婆梗係要放喺房度日日對住，方便使用吖嘛～你諗咗去邊呀，方便影相呃like咋！

呢間房簡直係毒L Dream Room啦！房不在大，有模型則靈呀！可以成間房放滿自己嘅至愛，畀佢哋360度圍繞住你，真係幸福到呢～冇女都冇所謂喇（好似係）！最開心嘅係唔止有地方放自己買返嚟嘅收藏，仲有地方自己改模型砌場景呀！

仔細啲睇下間房，呢位仁兄嘅口味都幾多元化喎。由早期啲嘅小露寶、Star War、叮噹同鐵甲萬能俠，去到數碼暴龍、高達同妖怪手錶都有，真係睇到眼都花埋呀！你而家可能諗緊，而家毛毛介紹示範單位咩，有咁大間房同模型有幾勁呀，有錢咪得囉～

如果你以為呢間真係一間普通嘅房，少年人，你真係太年輕喇！呢間笨唔係一般嘅放模型嘅房，係一座放模型嘅房嘅模型呀，係咪仲勁過雞包紙包紙包雞包雞包紙先！你睇到嘅全部嘢，唔止係啲模型同Poster，就連枱上嗰包薯片同地下嗰袋某牌子嘅衫，都係人手整出嚟嘅mini版嚟㗎！

有圖有真相，呢間房嘅細緻度，如果唔係有返真人或者真人比例嘅物件做對比，真係睇唔出原來間房本身就係模型，最犀利嘅地方，係部微型電視真係有畫面睇㗎！叮噹呀叮噹，借個放大縮細電筒嚟吖，咁咪可以一係放大間房，一係縮細毛毛入去住囉！

封面圖片及資料來源：Hank Cheng