聽到有得食壽司已經夠晒開心㗎喇，如果係食迴轉壽司，有得見到唔同款嘅壽司喺自己面前轉嚟轉去，有種選妃嘅感覺，又有種唔知會唔會「蘇州過後冇艇搭」嘅刺激感，就仲開心呀！不過迴轉壽司都有缺點㗎，佢轉得咁慢，有時老遠就睇中碟三文魚又要等咁耐先嚟到，好冇癮㗎嘛！

壽司就見得多喇，咁有動感嘅壽司你又見過未先！碟壽司喺迴轉帶上面以秒速五公里嘅速度飛去客人面前，保證新鮮，簡直係壽司界小明呀！

唔知識飛咁快嘅壽司可以喺邊度食到呢，等毛毛即刻請假去日本食先！不過佢條迴轉帶郁得咁快，客人會唔會連伸手拎壽司都拎唔切㗎？傻豬嚟嘅，其實唔係碟壽司跑得快過小明，而係特別攝影效果嚟㗎！呢個攝影師平時影開飛機升降嘅，今次就嚟到迴轉壽司店練習～

有玩開攝影嘅朋友都知道啦，想練動態攝影真係唔易㗎，影巴士又畀人話巴膠，去運動場影人又畀人話偷拍，影動物呢……石屎森林仲邊有野生動物㗎？如果可以喺迴轉壽司店歎住冷氣舒舒服服咁影就perfect池喇！

下次你不如都係去有架火車仔送壽司嘅迴轉壽司店練動態攝影啦，架火車快過小明點都正常過碟壽司快過小明吖嘛……

回転寿司で流し撮りの練習をする人 pic.twitter.com/SolCxm6wJv

— Takashi (@regacy_sti) February 19, 2017

封面圖片、資料來源連結：regacy_sti／twitter、模擬泡泡