那些年，無論係YES!卡、遊戲王、Pokemon卡，定係數碼暴龍卡，對於小學雞嚟講，手執正版稀有卡同拎住張黑卡一樣咁威威呀！可惜往事只能回味，就算當年你有幾輝煌嘅戰績，喺你嘅成長過程中，有一種無奈叫阿媽覺得你大個喇，所以幫你掉晒或者送晒啲卡畀人。就算有幸留低少少，啲卡都不復當年嘅光彩喇。

與其淨係收埋啲回憶，不如做啲嘢美化佢好過啦！呢位網友就儲咗唔少Pokemon卡，但唔會搵人對戰，咁咪得返個儲字？要儲就梗係儲啲靚嘅嘢啦，所以就自己郁手將Pokemon卡上面幅圖擴展，變成一幅畫咁喇～

唔睇返原裝卡都睇唔出原來係後期製作個背景出嚟呀，仲以為連啲精靈都係佢自己畫?！

以前見到張卡幅圖咁靚，都會好想知道原圖係點，而家補完咗全圖，有埋成個背景，真係好夢幻呀！一啲違和感都冇，除咗要有返咁上下嘅創作力量同幻想，都要有返咁上下畫功先做到㗎。不過畫到咁，如果抽起條筋想玩返鋪咁點先？

咁咪好似呢張超夢閃中閃咁，留返啲字同招式咪得囉！最犀利嘅係呢張卡嘅閃卡效果都係佢自己加上去㗎！對戰嗰陣拎張超夢夢出嚟已經夠晒霸氣啦，仲要係拎呢張超級特別版嘅閃卡出嚟，肯定睇到對手變樹熊樣呀！

就算係兩三張卡嘅連圖都完全難唔到佢，送畀當年同你對戰過嘅老死，一人keep一張又得，自己當係一幅畫咁收藏都得，得咗！

網友話，有好多人捐啲卡畀佢畫，亦都有啲人見到自己啲卡花咗爛咗，所以網友幫佢哋畫返靚仔，仲有啲人係想呢個神之手幫佢哋畫靚張卡之後，佢哋可以傳張卡畀下一代咁話喎。無論咩原因，其實都係想保存返個美好嘅童年回憶啫～睇完係咪好後悔自己掉晒啲卡呢？仲唔快啲返去搵下床底啲鐵罐，話唔定會收埋咗一兩張呢！

封面圖片及資料來源：Lunumbra's Awesome Painted Cards