返工返到悶悶地，不如搵啲嘢玩下囉？要玩，就梗係玩大家最親愛嘅同事啦！

話說，最近網上就瘋傳咗幾張相，話有網民一返到公司就發現自己枱面隻mouse好似有啲怪怪地。嗱，無線mouse就話會畀人拎走咗個usb插頭，搞到郁唔到啫，但呢位網民隻mouse係有線mouse，照計應該好安全㗎……唔通佢畀同事拎走咗mouse入面粒波波？

係都唔出奇呀，粒波波彈下彈下咁好玩，毛毛小學上電腦堂嗰陣都好鍾意拆佢出嚟玩㗎～

不過喂咪住先，點解隻mouse拎上手個質感咁軟綿綿嘅？

原來班hihi同事唔係拎走咗mouse入面粒波波，而係成隻mouse拎走咗，仲換咗個饅頭上去呀……

老老竇竇，其實有心玩9呢位網民嗰位同事都算有心思咯，喺個饅頭上面畫晒左右鍵同logo不但止，仲要插埋mouse線，第一眼望落去嗰下真係饅頭mouse傻傻分不清呀！between，玩9同事就冇乜所謂嘅，但你哋唔好玩埋食物先得㗎，個饅頭畀你哋咁畫法仲邊有人想擺落口啫！唉，又要召喚爾康喇。

資料來源：檸橗小妹愛糖果Sally／微博