大家都係搞鐵路，但日本嘅鐵路公司就受歡迎得多。除咗係因為日本嘅鐵路公司冇齋加唔減機制之外，仲因為佢哋同電影、動畫有密切嘅關係，成日都會同啲出名嘅電影同動畫搞聯乘活動。

嗱，大家睇下，早排JR先喺東日本搞咗個《龍珠》嘅聯乘活動咋嘛！聽講喺活動範圍內，每個車站都有一個《龍珠》嘅代表角色同印章，只要你儲夠一定數量嘅印章就可以換禮物㗎喇！

而高円寺站嘅代表角色就係格比達嘞。

不過咁，呢個站最特別嘅都唔係格比達，而係一班瞓身工作嘅員工呀！

話說有網友就喺高円寺站嘅樓梯見到一張咁嘅海報……嘩，邊個咁大整蠱將可愛嘅站務姐姐影成咁呀？不過喂咪住先，呢個動作好似有啲熟口面喎……

睇到呢張認得喇啩？係就係準備動作，但唔係舉起隻腳準備走人呀……咁都認唔出？畀埋下一張你睇啦！

做到咁你都唔識嘅話，你就真係好打有限喇，呢個動作咪臭係《龍珠》入面嘅融合囉！姐姐呀，但係你得一個人喺度做係融合唔到㗎啵，使唔使乘客幫下手呀？相信毒L們都好樂意同你融合㗎喎～

btw，以為呢班站務姐姐已經夠瞓身？睇埋大佬先啦！

做嘢最開心，就係有一個比你仲玩得嘅上司。原來唔止站務員要做動作，連站長都要一齊「咖咩哈咩哈」呀（雖然大家睇到之後個反應都係會變咗「哈哈哈哈哈」…）！

溫個提，呢個活動去到2月27日就完㗎喇，所以想去影呢啲特別版Poster打個卡就要快喇。btw，下次如果聯乘美少女戰士，唔知會唔會有站務姐姐著住水手服影Poster呢？

封面圖片及資料來源：HiroatDB/twitter 、ricopin4649／twitter