究竟有雞先定有蛋先？呢個真係十世都諗唔明嘅哲學問題。雞蛋會孵雞仔，雞仔大隻變母雞又可以生蛋。不過唔係隻隻雞仔都咁好彩可以有大隻嘅機會㗎⋯⋯如果啲雞仔孵出嚟嗰陣有缺陷，好多雞農都會直接放棄佢哋，真係好慘慘豬呀。

好似呢隻雞仔咁，出世冇耐就學人腿張開，你曳呀你，跟邊個學㗎？嗱，雖然人都會有外八字腳，但係雞仔今次真係太嚴重喇，企都企唔穩呀！死啦，畀飼養員睇到咪Die Hard？

做咩綁住佢呀！人哋行唔到已經好慘㗎啦，仲綁嚿海綿落去？唔通你想用十大酷刑折磨雞仔？人嚟呀！虐畜呀！

哦～原來飼養員綁嚿海綿落雞仔隻腳係想幫雞仔矯正返對腳啫～綁住雞仔對腳，跟住放喺一個啱佢size嘅容器入面一兩日就得㗎喇～雖然雞仔呢段時間冇得周圍跑跑跳跳，飼養員又要特別照顧同餵食，但係睇到個效果就咩都抵返啦～

睇下，雞仔終於可以腳踏實地做雞喇！其實呢個方法係北九洲市立總合農事中心Post出嚟，希望可以幫到啲有類似問題嘅雞仔㗎～

佢哋都明啲大量養雞嘅雞農未必可以花咁多時間喺一隻雞仔度，但係工作人員都希望教咗大家咁做， 可以減少雞仔畀人篩走嘅機會，就算雞仔大個都係畀人食落肚，都好過出世冇耐就冇命吖，好似係。

封面圖片及資料來源：Nouji_center／twitter