之前興Pokemon Go嘅時候，周街都係Pokemon嘅嘢，唔止有公仔同玩具，仲連精靈球尿袋都有?～老老竇竇，拎起個精靈球尿袋嗰陣，真係有股衝動想掉佢出去呀！

而最近，日本又推出咗新嘅寵物小精靈食玩，今次係一套11款嘅精靈球糖盒，仲要係金屬色嘅精靈球糖盒嚟呀！望落果然靚過之前廿蚊卅蚊扭一粒嗰啲扭蛋殻呀下。其實之前官方都有情報會出呢套食玩，但係到咗今個月先發佈完整資訊同埋開始預售咋。

呢個糖盒最吸引嘅地方就係可以掛喺腰上面！以前出啲精靈球咁大粒，想好似動畫主角咁掛六粒喺腰度都唔得，而家新出呢款size啱啱好，仲有埋個掛夾畀你夾住喺腰間，訓練員，你唔係唔買呀？

話明喺糖盒，入面梗係放糖㗎啦，跟佢Set買會跟埋薄荷糖，唔鍾意嘅話，你都可以拆咗個糖隔放自己鍾意嘅精靈公仔入去嘅～

暫時就有兩Set可以揀，一Set係全11種11個波連六個夾，價錢係7,020円。另一種賣5,400円都有10個波，雖然聽落好似抵啲，但係入面只會有6種波，咁咪一定有重複？

不過5,400呢set最大嘅賣點除咗平，係有特別版嘅比卡超精靈球呀！想扮小智嘅話，你知要訂邊set啦？幾時有得訂？開始咗啦，你唔知咩？唉⋯⋯但係扮到小智又點呀，咪又係冇佢咁多女⋯⋯

封面圖片及資料來源：Pokerin