明明早兩日曬到阿媽都唔認得，想趁放假出去郊遊下都畀個大太陽嚇親㗎嘛，點知今日又無啦啦落大雨喎，真係仲難捉摸過女人心呀！每逢落雨，都實有人喺Facebook度post歌詞，好似咩「天下起雨了 人是不快樂」、「下雨天總掛念從前」、「一個人撐傘 一個人擦淚 一個人好累」咁，落親雨都要post，到底你哋悶唔悶㗎……唔通落雨就一定要空虛寂寞凍嘅？！

有人覺得落雨好浪漫，有人覺得落雨好平常，但對呢個同學仔嚟講，就一定係空虛寂寞凍喇。喂，細佬，落狗sss咁大雨，你仲企定定喺度由佢兜頭淋？你估你好瀟灑呀？一陣淋病就唔好啦！

話說有一日放學嘅時候，突然落起大雨喎，學生哥最興就係唔睇天氣做人㗎喇，個個都冇帶遮，咪一出校門就狗衝去避雨囉，幾咁狼狽呀！但係喺呢班狗衝嘅同學仔入面，有個著黑色tee嘅肥仔竟然企喺度，郁都唔郁，望實個天……

睇到佢嘅背影，就感覺到一陣悲涼……年紀小小就已經有呢種滄桑，呢位同學仔一定有啲不為人知嘅過去，唔好咁灰啦，講出嚟，睇下大家幫唔幫到你？

當事人就表示，原來佢唔係有咩心事，亦唔係覺得連個天都唔鍾意佢，而係……測試緊佢個防水耳機。

嗯嗯，而家輪到毛毛想企喺度淋雨喇！還返啲眼淚同關懷畀我呀，呢個世界到底仲有咩係信得過㗎！

I RECORDED PEOPLE RUNNING BECAUSE OF THE RAIN BUT THIS KID WAS JUST STANDING THERE SO I ENDED UP WITH THIS GEM pic.twitter.com/Q0Ceccmrw1

— mel (@melliinaa_) April 11, 2017

封面圖片、資料來源連結：Sal_Oce23／twitter