打工仔最想係咩？發達囉！發咗達咪唔使做囉，仲可以買樓買車⋯⋯唉，好心你咁大個人就唔好咁多幻想啦。邊得嚟咁易發達吖，唔通返返下工會畀你執到金咩，一patpat嗰啲黃金就有得你踩！

但係外國有個人，真係返工做嘢都無啦啦發咗達呀！唔偷唔搶又唔使賭，安份守已真係會好人有好報？

是咁的，英國嘅Martin哥係一位Tune琴師傅，佢每日嘅工作就係幫啲走音嘅琴Tune返靚把聲。有一日，有間學校搵Martin哥幫手，叫佢執返正返一部歷史好悠久嘅琴喎。

呢部琴上一手嘅主人係一對老人家，佢哋擺咗部琴喺屋企33年，見而家屋企冇人彈，咪捐出去畀學校用囉～

作為一個專業嘅調琴師，聽得出部琴有咩問題，係一件好正常嘅事吖～Martin哥一聽就聽得出部琴入面一定有啲嘢塞住咗，要同佢通通個任督二脈先得！

拆開個琴之後，果然不出佢所料，琴入面有8包嘢喺度，不過Martin哥心諗，應該都係啲驅蟲劑之類嘅嘢啫，嚇佢唔到嘅～

點知一打開，入面係一堆金幣，仲要唔係朱古力金幣喎，堅係真金呀！古乳有暈，地上執到寶，問天問地攞唔到。咁嘅情況，自己袋咗都冇人知啦～

你當Martin哥係咩人呀！佢即刻話畀校方知，跟住校方再通知有關當局派人做鑑定。經過點算同埋檢查，鋼琴總共收埋咗900幾個金幣，值成500萬港幣㗎！

如果搵唔到呢批金幣嘅真正物主，根據寶藏法，啲金幣就會交畀發現金幣嘅人同鋼琴而家嘅物主平分，即係學校同Martin哥啦～咁捐鋼琴嘅公公婆婆咪好慘？

公公婆婆就話唔介意喎，反正都捐咗出去啦。而家最揼心嘅應該係呢幾廿年嚟去公公婆婆屋企幫佢哋Tune琴嘅師傅呀！

封面圖片及資料來源：每日郵報、The Bristish Museum／Youtube