夏天為大地帶嚟美腿，Grad Din就為同學帶嚟靚女。平日唔多打扮嘅女同學，一去到Grad Din就好似識變臉咁，成班都唔認得呀！咁又係嘅，Grad Din 一生人得一次，點都要扮靚啲，留返個美好回憶吖嘛～

香港就有Grad Din，外國都有Prom（即係畢業舞會），但係睇親啲美劇同電影，Prom都好似成日拉埋去溝女同呃蝦條呢啲嘢度，可唔可以正面啲呀？

毛毛梗係唔會整張美女正面相出嚟就叫正面咁膚淺啦！呢張相入面個女仔叫Milan，佢著嗰條裙好有意思㗎。因為裙上面唔係啲普通圖案，而係一張張黑人嘅相。

相上面好多個黑人明明手無寸鐵，但係就因為各種不合理嘅原因畀警察射殺。Milan就想透過呢條裙，控訴社會對黑人嘅歧視，希望喺Prom呢個特別嘅日子，做啲嘢令多啲人關注呢個議題。

有人就讚Milan咁做好有意思同有諗頭，好過有啲女仔爭係識喺Prom嗰陣賣弄性感咁話喎～但係都有啲人話佢，「位笨唔係咁上嘅」，即係話佢個原意係好，但個方法對死者好似唔多尊重喎⋯⋯

雖然大家對Milan呢個做法有讚有彈，但係至少呢件事真係成功引起傳媒嘅關注，令多啲人留意到呢個問題，都未嘗唔係一件好事吖！

封面圖片及資料來源：_milan23_／Instagram、terrencetorrence／Instagram