日劇「逃恥」（全名：「逃避雖可恥但有用」 ）雖然播完咗一段時間，但係毛毛間中都仲聽到有人用主題曲做鈴聲同見到人跳戀舞呀！又難怪嘅，男嘅就FF有個新垣結衣咁又靚女又識煮飯嘅老婆，女嘅就想要個天然呆得嚟又純品嘅筍盤星野源做老公。

咪睇劇入面星野源咁毒又傻下傻下，現實中嘅星野源好有音樂才華仲好風趣玩得㗎！嚟緊佢仲會出新節目?～

咦，唔好意思呀下，放錯咗慎吾媽媽啲相?⋯⋯唔係喎，冇錯喎！星野源喺5月做嘅60分鐘直播音樂節目入面，竟然反串做源小姐呀！唔知一班逃恥嘅Fans睇到呢個女裝look會心碎定心動呢？

再睇返慎吾媽媽張相⋯⋯媽呀，好亂呀，究竟邊個打邊個呀？唉～其實你兩個咁似樣，不如溝埋一齊做個女子組合Twins啦！肯肯定會紅呀！

其實反串做節目，喺日本都好常見㗎喇，講起反串，又點可以唔講埋喺《SmapXSmap》紅爆嘅杯緣的剛子呢？

唔知你又鍾意邊個嘅反串Look多啲呢下？計毛毛話，個個反串都咁卡哇依又咁靚，其實真係好難揀㗎⋯⋯不如今次就⋯⋯嗱嗱嗱，我係唔會講打和兩個字出嚟㗎！我真係唔會呢。

封面圖片及資料來源：gen_senden／twitter、matome、日本綜藝節目《 Smap X Smap 》截圖、Livedoor News