沙威瑪呢個名可能冇咩人聽過，但係只要你睇到佢張相就認得係咩嚟㗎喇！咪臭係喺嗰啲土耳其烤肉舖見到大大碌，畀師傅喺咁片啲肉出嚟嗰嚿嘢囉～

沙威瑪喺台灣有好多神秘嘅傳說，而最多人傳嘅就係沙威瑪原來係一種生物嚟㗎！因為佢啲肉會係咁生出嚟，所以啲肉咪好似削極都削唔完咁囉～（點解聽落咁似狼人嘅⋯⋯）

有網友話自己細個嗰陣見過沙威瑪養殖場，啲沙威瑪一隻隻咁四圍行，咁個養殖場咪好香噴噴？真係諗起都流口水呀！

仲有網友提供咗詳細構造圖，話啲舖頭原來係生勾勾咁慢慢片沙威瑪啲肉出嚟㗎⋯⋯嘩，家陣凌遲處死咩～好唔人道呀！傻豬嚟嘅，梗係唔係真㗎啦～沙威瑪其實係用好多嚿肉砌成嘅烤肉嚟咋嘛，但係呢鋪真係玩大咗喇，呢個故仔唔止喺網上瘋傳，仲喺台灣引起沙威瑪之亂呀！

不過點都估唔到，有野生動物組織竟然食住呢個熱潮，喺FB話野生捕獲咗兩隻沙威瑪BB，仲教大家點照顧佢哋?～

動物組織唔止教大家應該用咩箱裝住，就連救咗佢哋返嚟之後嘅步驟都做足畀大家睇㗎～獸醫哥哥咁都忍到笑，果然專業呀下！

最後組織都有講明，雖然沙威瑪係假嘅，但係入面嘅步驟同處理方法都係真㗎。好多網民都激讚佢哋有創意，大家睇到笑之餘，仲長咗唔少知識?啵！不過都有網民話，嚿沙威瑪整到好似人哋食完消化埋屙出嚟嗰啲咁囉⋯⋯識咩呀你，證明啲沙威瑪生命力頑強吖嘛！好似係⋯⋯

封面圖片及資料來源：野生動物急救站／Facebook、Jerry Wang、中時電子報、就業市場在台灣論壇