夏天為大地點止帶嚟雨水呀，仲有颱風?呀！你哋成日都掛住打風有假放，都唔諗下啲打風仲要返工嘅人幾辛苦嘅！好似記者咁，颱風仲要去到最前線即場直播畀大家睇下有幾大風呀陰功～

記唔記得呢位記者阿哥呀，為咗畀大家睇到颱風嘅威力，喺尖嘴海旁畀風吹到企都企唔穩，要即場示範紥馬呀！就算有帶頭盔都冇用啦，連埋對鞋畀風吹走咗喇，連鬼佬都要畀個like佢呀！

咪以為颱風先咁危險呀！雷雨都一樣咁得人驚㗎，啲雷行到隆隆聲，好多人聽到都唔敢出街啦。但係遼寧有個主播就緊守崗位，走上天台拎住把遮報天氣呀！

眾所9知，行雷嗰陣個雷就會搵地面上最高嘅嘢嚟劈㗎啦！點知好劈唔劈竟然劈中咗報天氣嘅主播⋯⋯把遮呀！睇片淨係見到主播突然慘叫一聲，跟住遮都掉埋喇。

見佢揈揈下隻手咁，咪以為佢係做緊體操呀，主播堅係電親隻手㗎！好多觀眾都讚佢夠專業夠搏，都有啲網友講笑問佢係咪嗰日發過咩誓嚟呀？嗱嗱嗱，唔做得你咁講㗎下，一陣人哋老婆醒起啲咩就唔好啦～

Any肥，多得呢班記者瞓身報道天氣，我哋先可以喺屋企安安樂樂都知道出面咩情況咋！辛苦晒你哋喇！

封面圖片及資料來源：無線新聞截圖、劉曉東852／微博