那些年仲好興租碟睇嘅時候，曾經有間公司叫「百視達」。係咪突然之間有好多回憶湧出嚟呢？咁你就暴露咗你嘅年紀喇，事關呢間公司早喺2004年已經撤出香港㗎喇！雖然間公司喺香港消失咗啫，但係人哋喺美國仲有鋪頭㗎。

弊在而家個個都上網睇戲，戲院都做唔住啦，更何況係租碟鋪？所以百視達越執越少，如果你去旅行咁啱見到一間，記得影定張相留念喇！

對於好多人嚟講百視達執咗好小事啫，但對於呢位自閉症嘅哥仔嚟講，就大件事喇！因為佢係百視達嘅忠實Fans，幫襯屋企附近間分店好多年㗎喇，而家執咗笠，搞到佢勁崩潰呀！

見到阿仔咁傷心，老竇同媽子真係心都痛埋呀，於是就諗咗條計仔氹阿仔開心喇～

就係喺阿仔間房整咗個迷你百視達，仲放曬佢最鍾意睇嘅戲上架呀！真係好Sweet呀！呢個百視達廿四小時無休，囝囝想幾時睇都得，又唔使擔心唔記得還碟要罰錢喎，直頭好過本來嗰個啦～

咪睇阿仔好似只係瞇瞇嘴笑，其實佢不知幾冧呀！睇完係咪好羨慕人哋有個私人百視達咁爽呢? 唔使羨慕喎，你咪自己整返個私人嘅D Drive囉～

封面圖片及資料來源：Javiii_Zuniga／twitter