由一出世開始，我哋就已經要同睡魔搏鬥，無論係校19幾個鬧鐘，定同FD子約定如果走八半堂就要請飲汽水呢啲招數都試勻晒啦，每朝都仲係想瞓多一分鐘得一分鐘，然後死死地氣咁起身嘅。你話呀，如果有人每朝打嚟叫醒自己，係幾咁sweet先？

日本而家就新推出咗一個叫「Fisherman Call」嘅免費漁夫Morning Call服務喇！係人都知漁夫天未光就已經出海打魚㗎啦，點都早過你班大帝起身嘅，所以搵佢哋做人肉鬧鐘就啱晒！

試諗下，每朝早第一下傳入耳仔嘅，都係一把沉實有力嘅磁性聲音，喺海邊溫柔咁叫你起身，喚醒你每個腦細胞……係咪諗下都很想要呢？呢個服務仲有得畀你睇相mark邊位漁夫叫你，真係好貼心呀！

有冇諗過，喺你覺覺豬緊嘅時候，辛勤嘅漁夫已經出海打緊魚喇！係咪即刻覺得人生唔應該花咁多時間攤喺度呢？仲唔起身努力做啲有意義嘅事？！

魚呢，就人人都識食，但打魚咁辛苦，就唔係個個後生仔都肯入行喇，所以漁業已經開始青黃不接，而呢個聽落咁搞笑嘅服務，其實係想畀大家多啲認識日本漁業嘅～

唔止叫你起身呀，漁夫叔叔仲影埋自己嘅收穫畀你睇?！嘩，咁大大大大大條魚，真係好充實咁喎！唔該有冇嗰個叫阿樂嘅漁民呀？我想包起佢叫足一個月呀。

封面圖片、資料來源連結：FISHERMAN JAPAN／YouTube

同場加映： 【很想要吧】日本試辦「沉默的士」 唔驚畀司機撩傾偈