我哋好多時會讚狗狗係義犬、忠犬，因為佢哋真係又乖又愛主人吖嘛。雖然佢哋有時會好百厭，但係患難見真情，到主人有事嘅時候，就知汪星人有幾好㗎喇！

是咁的，話說阿根廷有個主人，心血來潮想修下屋企出面棵樹，點知一修就出事喇！哎吔！主人喺六尺咁高跌落嚟，唔止撞親個頭，仲失去埋意識呀！好彩有人發現到幫佢報警咋，仲有人全程陪住佢?。

正確嚟講係全程有「狗」陪住佢呀～

狗狗見主人郁都唔郁咁瞓喺條路度，即刻伏係佢身上面攬住佢。一直等到救援人員嚟，做緊急救程序嗰陣都冇走過，真係攬到實一實呀！毛毛隔住張相都Feel到好Warm呀～

狗狗：「我點都唔會離開我主人㗎汪！」

救護員：「但係我哋要抬佢上車喎⋯⋯」

狗狗見主人要上救護車去醫院先肯起身咋，但係都喺車側邊跟足成個上車過程⋯⋯直到架救護車走咗之後，佢就唯有默默咁等主人返嚟啦⋯⋯

不幸中之大幸，主人只係受咗輕傷，好快就同呢隻忠犬團聚啦！嗚⋯⋯實在太令人滾動喇⋯⋯有記者訪問返主人先知，原來狗狗本身都係流浪狗，係主人帶佢返屋企，仲當正狗狗係自己仔仔咁照顧?！

所以話，你對毛孩好，毛孩係知道㗎。佢哋仲會用自己嘅方式，向你表達佢哋對你嘅愛?！

封面圖片及資料來源：the Dodo、La Brújula 24

忠犬回顧：【洋蔥20小時】主人雪地跌低唔郁得 狗狗趴喺身上為佢保暖