喺呢個社會，做小朋友真係唔容易！由BB嗰陣就要開始儲定Profolio，參加啲咩BB爬行大賽、飲奶大賽咁。到咗入幼稚園仲要變埋畢加索，參加啲咩填色畫畫比賽呀！

好似嗰幅喺網上瘋傳嘅填色比賽幼兒組亞軍作品咁，一睇就肯肯定係呢個3歲小朋友好有填色天份先畫得出嚟啦！啲人仲話係請槍喎，睇埋下面呢幅大作，你就知道而家啲小朋友係幾有藝術細胞喇！

有位台灣網友喺報紙度睇到一個母親節繪畫比賽嘅結果，發現冠軍作品真係驚為天人，簡直係畢加索投胎先畫到出嚟呀！

呢個比賽係叫小朋友畫佢哋心目中嘅媽咪嘅，所以好多小朋友都發揮佢哋嘅無窮無盡小宇宙，例如畫到阿媽好似進擊的巨人咁，又畫阿媽係條霸王龍，都幾有創意啵！

但係睇到呢幅冠軍作品之後，真係當堂嚇一跳，然後得啖笑呀！呢幅咁抽象嘅畫，真係睇唔出有邊忽似阿媽喎⋯⋯唔通佢想畫自己仲係阿媽粒卵嗰陣個卵樣？

原來呢幅大作叫《媽媽的ㄋㄟㄋㄟ》呀！咩係ㄋㄟㄋㄟ？音譯咪就係「奶奶」囉，應該就唔係講緊嫲嫲嘅，見唔見到幅圖隱隱約約有兩個圓圈加一點呀，咁你知呢對係咩奶奶啦？

呢幅咁抽象嘅畫點解會拎到「首獎」？睇下專業評審嘅意見先～原來係引起咗評審嘅悸動同共鳴呀！嘩，毛毛睇到呢句都悸動咗兩下呀！所以話，嗰啲畫得咁靚嘅畫又點會係請槍呢？小朋友咁有畫抽象畫嘅天份，畫兩下都拎冠軍啦！仲使咩家長畫得咁辛苦先拎個亞軍啫～好似係。

封面圖片及資料來源：dcard