直播冇take2，好容易就出事㗎喇！仲記得有次BBC直播訪問教授，個教授坐定定喺屋企都會突然畀小朋友亂入搶fo⋯⋯唉，唔怪得今次係喺條街度做直播又會畀人亂入啦！

是咁的，話說最近BBC有段直播就係由主持同政治中心副主任兩個人喺街度做嘅，點知就喺副主任講講下嘢嗰陣，鏡頭前突然殺出一位著住豹紋衫嘅女途人，佢仲要企正喺中間?喎！嘩，無啦啦入鏡想點呀？

不過身經百戰兼轉數快嘅主持又點會畀佢嚇到吖，於是主持就喺女途人舉起手指公搶鏡嗰陣使出一招乾坤大挪移，諗住一掌推佢出鏡，點知⋯⋯

咦，點解會變咗龍爪手嘅喂？今次大鑊喇，班hihi實cap晒圖恥笑呢位主持啦！molamola，主持以後會唔會畀人當咗係咸豬手㗎？

最後女途人大力拍咗主持一下，然後就若無其事咁喺走咗嚕⋯⋯

btw，其實事後主持都有解釋返，佢只係想推開嗰位小姐，繼續出Live，真係冇心㗎。你放心啦，我哋實信你㗎喎！不過講開又講，BBC最近好似做親Live都出事，使唔使搵定零擰師傅睇個風水，擇個靚日子靚時辰先做吖？

封面圖片及資料來源：衛報